قصيدة المقابر الجماعية شعر شعبي للشاعر العراقي علي الكرعاوي

سوادي يأبني الفرهداك الموت
ياناي الحزين اليجلب الونه
ياهيبة عمامك ياعمود البــيت
يادم الشهادة المنه اتـحنه
يافجر الليالي المظلمات السود
يا اجمل نواعي وبيهن اتغنه
يابعد العيون العمن يمه عليك
ياعظم المصاب الحيل المنـه
رحت عني يايمة بليلة مارديت
وبسجن النظام اهناك موعدنه
تلاكينه يايمه بحضرة السجان
كتله ابني العزيز وارد ابوسنه
مد ايده ولطمني اعله الوجه لطمات
وبقت يمة عليك اتهل مدامعنه
دورت المقابر عنك ومليــــت
هواي امن المقابر يحوي موطنه
زلم واطفال شفت اني وشفت شبّان
وشفت نسوان ميته بلا ذنب هنه
وشفت شايب جبير ومنه طاح اعكال
وشفت طفلة بريئة وطيرة من جنة
وشفت منظر اظن كل عمري ما انساه
شفت طفلة رضيعة ويمها ممتها
وشفت قران مرمي ويشتكي امن الجور
وسجادة صلاة وعليها تربتــها
ليش بيا ذنب تنعدم هل الشبـــاب
وبس اعظام ظلت صعبة دفنتها
وكلي بيا سبب تتيتم الاطفــــال
وتجري اعله الخدود بحزن دمعتها
شيعه احنه شجنينه وننذبح كل يوم
واشباه الزلم زادت عداوتـــها
شيعه وما تذل يالناصب اسمع زين
ومن حيدر علي تستمد عزتــها
شما زاد الظلم نرضه احنه مظلومين
وختغيب الشمس شلي باشعتــها
عدنه المرتضى الرد الشمس مرتين
ولو ردنا الشمس مو صعبة ردتها
واجب تعتلك هل الارض كلها اشموع
عله ارواح اللي راحت تحت تربتها
واجب هل الارض تعلن حداد اليوم
ومن حزب البعث تعلن عداوتـها

الشاعر العراقي علي مجيد الكرعاوي