خلص عمري بجي وأنوح ودموع
مو قصة حزن ولا امراض وجوع
قصة بلد من كل كترتتناهشه ذياب
تعب من الصدمات أوتاليه مبيوع
قصة اقليم أوسط قصة جنوب هناك
مكاتل عالمكابر والسهو ما مرجوع
خلص عمري ادور عله الميتين أبشوك
ادور بالجماجم والكلب دك موجوع
بكلت ابو أو اخو لو حتى هم جيران
من بين الضحيات يصيح رد يا مكموع
الملم اعظامه نخوه بشليل الضيم
احط نيشان كبرة واغفة يمه اسبوع
كلنه الحزن مات من علكو سلطان
طن من الحبل وراسه بجتافة مركوع
ثاري الحزن ضاربه بنج بأيد
نفض تراب الموت ورد جايبله مشروع
خلة البلد بسباب ما يصفة خوان
سنه شيعة وكل وحدة بيهه فروع
جنه الجثث أندوره جوه الكاع
هسه الجثث بالشوا ع براس مخلوع
والمفخخ قسمنه هم صنفين
يا جثة بمشرحة يا عاجز بطرف مشلوع
وما اريد احجي بعد الحجي صار هواي
واعتقد بعض الحجي ما ينحجي ممنوع
**********
ضياء الدراجي
